ភ្នំពេញ ៖ យុវជនម្នាក់ក្នុងចំណោម២នាក់បានរងរបួសបែកក្បាលហូរឈាមស្រោចខ្លួន បន្ទាប់ពីមានការប៉ះទង្គិចជាមួយយុវជនមួយក្រុមមានគ្នា៤ទៅ៥នាក់នៅហាងលក់កាហ្វេពេលរាត្រីមួយកន្លែង ហេតុការណ៍នេះបានកើតឡើងកាលពីវេលាម៉ោង១២និង១០នាទីរំលងអាធ្រាត្រឈានចូលថ្ងៃទី២៥ខែមិថុនាឆ្នាំ២០១៤ ត្រង់ចំណុចខាងលិចក្រោមស្ពានអាកាសស្ទឹងមានជ័យ ស្ថិតក្នុងសង្កាត់បឹងសាឡាង ខណ្ឌទួលគោក។
ប្រភពព័ត៌មានពីយុវជនរងគ្រោះសុំមិនបញ្ចេញឈ្មោះបានអោយដឹងថា នៅមុនពេលកើតហេតុរូបគេនិងមិត្តភ័ក្តិម្នាក់ទៀតបានមកហាងកាហ្វេមួយកន្លែងដែលមាននារីស្អាតអង្គុយកំដ ប៉ុន្តែរូបគេមិនបានចូលទៅក្នុងហាងនោះទេគឺអង្គុយនៅខាងក្រៅ ដោយអោយមិត្តភ័ក្តិរបស់គេចូលទៅក្នុងចុះ ព្រោះរូបគេចខ្លាចបាត់ម៉ូតូ មួយសន្ទុះក្រោយមកស្រាប់តែមាននារីម្នាក់បានមកក្បែររូបគេហើយប្រាប់អោយរូបគេចូលទៅអង្គុយនៅខាងក្នុង តែរូបគេបដិសេធ ហើយនារីម្នាក់នោះបានទាញរុញនិងអូសរូបគេអោយចូលក្នុង ដោយមានការប្រតាយប្រតប់គ្នាបន្តិច ស្រាប់តែនារីម្នាក់នោះបានហៅអោយបុរស៤ទៅ៥នាក់ដែលជាបក្ខពួករបស់នាង វាយមកលើរូបគេ ភ្លាមនោះមិត្តភ័ក្តិរបស់គេក៏បានចេញមកជួយហើយក៏មានការប៉ះទង្គិចគ្នាមួយប្រាវ បណ្ដាលអោយរូបគេរងរបួសបែកក្បាល ចំណែកមិត្តភ័ក្តិរបស់គេក៏រងរបួសផងដែរ ហើយមិត្តភ័ក្ដិរបស់គេក៏បានរត់គេចពីកន្លែងកើតហេតុព្រោះវាយមិនឈ្នះគេ ដោយរូបគេក៏បានរត់ទៅសុំការអន្តរាគមន៍ពីមន្ត្រីប៉ូលិសដែលប្រចាំការនៅស្ពានអាកាសស្ទឹងមានជ័យ។ ភ្លាមៗសមត្ថកិច្ចមូលដ្ឋានក៏បានចុះមកអន្តរាគមន៍ដល់កន្លែងកើតហេតុគឺនៅសល់តែរូបគេម្នាក់ប៉ុណ្ណោះ រួមនិងម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ខ្ទេចរងការខូចខាតព្រោះត្រូវយុវជនមួយក្រុមនោះវាយកំទេច។ជនរងគ្រោះបានបន្តថា រឿងនេះគេសង្ស័យថាពួកយុវជនទាំងនោះចង់ធ្វើស៊ីរូបគេដើម្បីយកម៉ូតូ (វាយយកម៉ូតូ) ។
ក្រោយពេលកើតហេតុសមត្ថកិច្ចបានអោយជនរងគ្រោះទៅព្យាបាលរបួសសិន ហើយចាំមកដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលបឹងសាឡាងជាក្រោយ ដើម្បីចាត់ការតាមនីតិវិធីច្បាប់៕
មតិយោបល់