កាលពី១០ឆ្នាំមុន ពុំមានស្មាតហ្វូន Touch sreen ,ពុំមានស្មាតហ្វូនប្រើប្រាស់អ៊ីនធើណែតលឿន, ពុំមាន​ប្រព័ន្ធដំណើរការ Android, iOS គឺមានតែ Symbian,BlackBerry, Windows Mobile និង Palm ប៉ុន្តែ​ស្មាតហ្វូនកាលពីជំនាន់នោះពិត​ជា​​អស្ចារ្យខ្លាំងណាស់ បើធៀបនឹងស្មាតហ្វូននាពេលបច្ចុប្បន្ន។

នៅថ្ងៃនេះ គេហទំព័រ ដំណឹង សូមលើកយកស្មាតហ្វូន​ចំនួន ១០ ដែលអស្ចារ្យបំផុតកាលពី ១០ឆ្នាំមុន៖

BlackBerry 7000

ជាស្មាតហ្វូនដែលអស្ចារ្យបំផុតរបស់ក្រុមហ៊ុនផលិតទូរស័ព្ទដៃកាណាដា BlackBerry នាឆ្នាំ ២០០៥ ដែលមានលក្ខណៈពិសេស​ជាមួយនឹង​ប៊ូតុងចុច SureType QWERTY។ ស្មាតហ្វូន​មួយនេះ ត្រូវបានពេញនិយមបំផុតសម្រាប់អ្នកប្រើប្រាស់ធម្មតា ​ជាង​អ្នក​ជំនួញ។

HP iPAQ hw6500

កាលពីមួយទសវត្សរ៍មុន ក្រុមហ៊ុន HP បានបង្ហាញស្មាតហ្វូនជាច្រើន ដែលប្រើប្រាស់​ប្រព័ន្ធដំណើរការ Windows Mobile ជាពិសេសគឺ HP iPAQ hw6500 ដែលទទួលបានការពេញនិយមបំផុត បើទោះបីជា​គ្មានកាមេរ៉ាសម្រាប់ថតរូបក្ដី ប៉ុន្តែ​កម្មវិធីមួយចំនួន​ដែល​ភ្ជាប់​មក​ជាមួយ បានធ្វើឲ្យ HP iPAQ hw6500 ក្លាយជាស្មាតហ្វូនដែលអស្ចារ្យ នាឆ្នាំ ២០០៥។

HTC Universal

HTC Universal ជាស្មាតហ្វូនដំបូងគេបង្អស់ ដែលប្រើប្រាស់ប្រព័ន្ធដំណើរកា Windows Mobile 5.0 ហើយក៏ជា Pocket PC ដំបូង​គេ​ដែលប្រើ 3G។ នៅពេល HTC Universal បង្ហាញវត្តមាននៅលើទីផ្សារ គឺពិតជាបានធ្វើឲ្យអ្នកប្រើរំជួលចិត្តចង់បានមកប្រើ ព្រោះវា​មាន​កាមេរ៉ាទំហំ ១,៣មេហ្គាភិចសេល អេក្រង់ទំហំ ៣,៦អ៊ីង មានប៊ូតុងចុច QWERTY និងមានអង្គប្រតិបត្តិ 520 MHz Intel processor ដែលផ្ដល់ល្បឿនលឿន។

HTC Wizard

HTC Wizard មានឈ្មោះ HTC Prodigy ​ឬ HTC P4300 ជាស្មាតហ្វូន​ប្រើប្រាស់​ប្រព័ន្ធដំណើរការ Windows Mobile 5.0 បន្ទាប់ពីHTC Universal។ បើទោះបីជាវាមិន​សូវមានលក្ខណៈពិសេសច្រើនដូច HTC Universal ប៉ុន្តែ​វាត្រូវបាន​អ្នកប្រើប្រាស់ធម្មតា​​​ចាប់អារម្មណ៍ និងមានបំណងចង់បាន។

Motorola E680i

ស្មាតហ្វូនមួយនេះត្រូវបានផលិតឡើងយកលំនាំតាម Motorola E680 ដែលចេញលក់នៅឆ្នាំ ២០០៤ ប៉ុន្តែ​ Motorola E680i វាអស្ចារ្យ​ជាង Motorola E680 ព្រោះថាក្រុមហ៊ុនបានបន្ថែមលក្ខណៈពិសេសជាច្រើន។ Motorola E680i ជាស្មាតហ្វូនប្រើប្រាស់ប្រព័ន្ធដំណើរការ Linux ដែលបានបំពាក់ឧបករណ៍បំពងសំឡេង 3D stereo និងមានប៊ិច។

Nokia 6680

Nokia 6680 ជាស្មាតហ្វូនរបស់ក្រុមហ៊ុន Nokia ដំបូងគេបង្អស់ បំពាក់កាមេរ៉ាមុខ (VGA) និងមានភ្លើង LED Flash សម្រាប់កាមេរ៉ាក្រោយ ១,៣ មេហ្គាភិចសែល ជាមួយនឹងប្រព័ន្ធដំណើរការ Symbian 8.0 (S60) ព្រមទាំងមានមេម៉ូរីក្នុង​ម៉ាស៊ីន​ទំហំ 10MB។

Nokia N90

ឆ្នាំ ២០១៥ ជាឆ្នាំ ដែលក្រុមហ៊ុន Nokia ប្រកាសបង្ហាញទូរស័ព្ទត្រកូល N ប៉ុន្តែមិនច្រើនជាង ៦ម៉ូដែលប៉ុណ្ណោះទេ។ Nokia N90 ជាស្មាតហ្វូនមួយក្នុងចំណោមត្រកូល N ទាំងអស់របស់ Nokia ដែលពេញនិយមជាងគេ ទាំងការរចនា និង​សមត្ថភាពពិតជា​ទាក់​ទាញ​អ្នកអារម្មណ៍អ្នកប្រើប្រាស់។ Nokia N90 ប្រើប្រាស់ប្រព័ន្ធដំណើរកា Symbian 8.1 (S60) មានកាមេរ៉ាទំហំ ២មេហ្គាភិចសែល ប្រភេទ Carl Zeiss។

Nokia N70

បើនិយាយពីទូរស័ព្ទដៃរបស់ក្រុមហ៊ុន Nokia ត្រកូល N វិញនោះគេមិនភ្លេចឡើយនូវ Nokia N70 ដែលជាស្មាតហ្វូន​មួយ​ពេញនិយម​សម្រាប់​យុវវ័យ និងអ្នកដែលចូលចិត្តលេងម៉ូដទូរស័ព្ទ។ កាលពីឆ្នាំ ២០១៥ ស្មាតហ្វូន Nokia N70 បានចេញនិយមដោយសារតែ​អ្នក​ប្រើប្រាស់ភាគច្រើនទិញយកមកថតរូប ចាក់តន្ត្រី មើលវីដេអូ។

Samsung SGH-D720

មិនទាន់ឈានដល់ដំណាក់កាល Touch screen ក្ដី ប៉ុន្តែស្មាតហ្វូន Samsung SGH-D720​ ត្រូវបានពេញនិយម​សម្រាប់​អ្នកប្រើប្រាស់​ដែលនិយមផលិតផល Samsung។​ Samsung SGH-D720 មានរាងតូចស្ដើង បំបាក់កាមេរ៉ាទំហំ ១,៣មេហ្គាភិចសែល និងមានភ្លើង LED Flash។

Samsung SGH-i750

Samsung SGH-i750 ជាស្មាតហ្វូនរបស់ក្រុមហ៊ុន Samsung ដែលត្រូវបានគេពេញនិយមសម្រាប់អ្នកចូលចិត្តទូរស័ព្ទ​ប្រភេទ​រុញ មិនប្រើ Symbian តែប្រើ Windows Mobile 2003។
​
យ៉ាងមិញដែរ សម្រាប់ស្មាតហ្វូនទាំង ១០ ដែលគេហទំព័របានជ្រើសរើសយកមកបង្ហាញ​និងផ្ដល់តម្លៃជា ស្មាតហ្វូន​អស្ចារ្យ​សម្រាប់​កាល​ពី ១០ឆ្នាំមុន? បើសិនជា​មាន​ចំណុចខ្វះខាត ឬ​មួយយ៉ាងណា សូមបញ្ចេញមតិនៅខាងក្រោម សូមអរគុណ!