កំពតៈ សិស្សានុសិស្សប្រមាណជាង២០០នាក់ដែលកំពុងសិក្សាភាសាបរទេស ដោយឥតគិតថ្លៃក្នុងអង្គការសកម្មភាពយុវជនកម្ពុជាCYA សាខាខេត្តកំពត បានទទួលសម្លៀកបំពាក់និងសម្ភារៈសិក្សា ក្នុងឪកាសបើកបវេសនកាលថ្មីឆ្នាំសិក្សា ២០១៦-២០១៧ របស់អង្គការកាលពីម្សិលម៉ិញនៅឃុំពរភ្នំ ស្រុកអង្គរជ័យ ខេត្តកំពត។

លោក ស៊ន សុផាត ប្រធានអង្គការសកម្មភាពយុវជនកម្ពុជាCYA បានឲ្យដឹងថា ការផ្តល់សម្ភារៈទាំងអស់នេះគឺដើម្បីផ្តល់ឱកាសឲ្យសិស្សានុសិស្សក្នុងតំបន់នេះបានទៅសាលារៀនកាន់តែច្រើន និងមានផ្នត់គំនិតស្រលាញ់ការសិក្សា។ជាមួយគ្នានោះដែរលោកបន្តថា មជ្ឈមណ្ឌលសិក្សាសហគមន៍នេះក៏បើកឲ្យសិស្សចូលរៀនក្នុងវគ្គសិក្សាថ្មីផ្នែកភាសាអង់គ្លេស និងជំនាញកុំព្យូទ័រ ដោយឥតគិតថ្លៃថែមទៀត។

ក្នុងនោះដែរលោកបញ្ជាក់ថា ការបង្រៀនភាសាអង់គ្លេស និងជំនាញកុំព្យូទ័រដល់កុមារតូចៗនៅតំបន់នេះ ដោយសារតែនៅតំបន់នេះជាតំបន់ដាច់ស្រយាលពិបាកស្វែងរកសាលារៀនភាសាបរទេស ដូច្នេះការផ្តល់វគ្គសិក្សានេះពិតជា មានសារៈសំខាន់ណាស់ដើម្បីឲ្យសិស្សទាំងនេះមានមូលដ្ឋានផ្នែកភាសានិងជំនាញកំព្យូរទ័រ កាន់តែទូលំទូលាយជាប្រយោជន៍អភិវឌ្ឍអនាគតរបស់ពួកគេ។

លោក រួន ថងឌី តំណាងអង្គការCYAក៏បានថ្លែងឲ្យដឹងថាសិស្សដែលកំពុងទទួលបានការសិក្សាភាសាបរទេសនៅទីនេះ គឺមិនចំណាយថវិកានោះទេ ដោយការសិក្សានេះក៏កំណត់តាមស្តង់ដារ និងគុណភាពត្រឹមកម្រិត៤ដើម្បីសិស្សានុសិស្សទាំងនោះដែលភាគច្រើនជាកុមារតូចៗទទួលបាននូវថ្នាលបណ្តុះបណ្តាលមួយដ៏ល្អពីសំណាក់គ្រូបរទេសចម្រុះជាតិសាសន៍។

លោក អ៊ុក គឹមសេង អនុរដ្ឋលេខាធិការក្រសួងព័ត៌មានដែលមានវត្តមានក្នុងឱកាសនោះក៏ថ្លែងនូវការគាំទ្រចំពោះសកម្មភាពអង្គការ ដែលជាផ្នែកមនុស្សធម៌មួយជួយដល់កុមារកម្ពុជាដែលពួកគាត់មានជីវភាពក្រខ្សត់ក៏ដូចជាកុមារដទៃទៀតដែលកំពុងទទួលបាននូវការសិក្សានៅក្នុងអង្គការនេះ ។

ស្របជាមួយគ្នានេះ លោក កាន់ ហ៊ុយ មេឃុំពរភ្នំ ក៏បានចាត់ទុកសកម្មភាពរបស់អង្គការកំពុងបំពេញនេះ ពិតជាបានធ្វើឲ្យប្រជាជនក្នុងឃុំរបស់គាត់ ទាំងកុមារទាំង អាណាព្យាបាលទទួលបាននូវអត្ថប្រយោជន៍ ក្នុងការបណ្តុះបណ្តាលធនធាន មនុស្សយ៉ាងពិតប្រាកដជាពិសេសទៀតនោះ គឺពួកគាត់ពុំចាំបាច់ចំណាយថវិកាសម្រាប់ការសិក្សានោះឡើយ។

គួរបញ្ជាក់ផងដែរថា អង្គការសកម្មភាពយុវជនកម្ពុជា គឺជាអង្គការមួយ ប្រមូលផ្តុំដោយក្រុមអ្នកស្ម័គ្រមកពីចម្រុះជាតិសាសន៍ រួមគ្នាធ្វើកិច្ចមនុស្សធម៌ នានា ជាពិសេសផ្តោតទៅលើការផ្តល់ជូននូវការសិក្សាភាសាដោយមិនគិតថ្លៃ ហើយកន្លងមកក្រៅពីនៅខេត្តកំពតគឺអង្គការបានបើកសាខាចំនួន០២រួចមកហើយ គឺនៅខេត្តបាត់ដំបង និង សៀមរាប៕