ខ្សែប្រយុទ្ធ Neymar បានជួបគ្រោះថ្នាក់ចរាចរណ៍អំឡុងពេលរូបគេជិះឡានផ្ទាល់ខ្លួនទៅព្រលានយន្ដហោះ ដើម្បីធ្វើដំណើរទៅប្រកួតជាមួយក្រុម Real Sociedad នៅរាត្រីនេះ។

ប្រភពខ្លះបានបញ្ជាក់ថា គ្រោះថ្នាក់នោះ Neymar មានរបួស ដោយតម្រូវឱ្យបុគ្គលិករបស់ Barcelona ទៅយកគេផ្ទាល់នៅកន្លែងកើតហេតុ ហើយក៏បញ្ជូនទៅមន្ទីរពេទ្យភ្លាមៗផងដែរ។ ឡាន Ferrari របស់គេ រងការខូចខាតខ្លាំង ខណ:ដែលសាមីខ្លួនក៏នៅក្នុងឡាននោះដែរ។

ខណ:ដែលបុគ្គលិកខ្លះទៀតនៅក្លឹប Barcelona បាននិយាយផ្ទុយទៅវិញថា ឡានរបស់ Neymar គ្រោះថ្នាក់មែន ប៉ុន្តែមិនមានអ្វីធ្ងន់ធ្ងរដល់សាមីខ្លួនទេ ហើយប្រកួតនៅយប់នេះរូបគេក៏អាចនឹងចូលលេងបានដែរ ព្រោះវាជាប្រកួតសំខាន់សម្រាប់ក្លឹប Barcelona ។

សូមបញ្ជាក់ថា Barcelona ត្រូវប៉ះជាមួយ Real Sociedad នៅយប់នេះក្នុងក្របខណ្ឌ La Liga ហើយអ្វីដែលពិសេសទៀតនោះ ប៉ុន្មានឆ្នាំមកនេះ Barca មិនដែលអាចយកឈ្នះលើក្រុម Sociedad បាននោះទេ។

Neymar បច្ចុប្បន្នក៏កំពុងតែមានរឿងក្ដីមួយផងដែរ ព្រោះរូបគេអាចនឹងត្រូវប្រឈមការជាប់គុកដល់២ឆ្នាំឯណោះ រឿងមិនបង់ពន្ធជូនរដ្ឋអេស្ប៉ាញ ក៏ដូចជាក្លែងបន្លំតម្លៃខ្លួនពេលផ្ទេរពីប្រេស៊ីលមក៕

ប្រភព៖ The Sun