នេះគឺជាលើកដំបូងសម្រាប់ក្រុម Barcelona ស្របពេលដែលក្រុម Dortmund បានយល់ព្រមលក់ Ousmane Dembele ក្នុងតម្លៃ ១៥០លានអឺរ៉ូ។

បើតាម The Sun បានឲ្យដឹងថា ក្រុម Barcelona នឹងចុះកុងត្រារយៈពេល ៥ឆ្នាំ ជាមួយខ្សែប្រយុទ្ធបារាំងវ័យក្មេង Ousmane Dembele ពីក្រុម Dortmund ក្នុងតម្លៃ ១៥០លានអឺរ៉ូ មិនហួសពីសប្តាហ៍នេះឡើយ។ គួរបញ្ជាល់ផងដែរថា ក្រោយពីការចាកចេញរបស់ Neymar ក្រុម Barcelona ពិតជាមមាញឹកខ្លាំងណាស់ ក្នុងការតាមទិញកីឡាករមកជំនួស តំណែងនេះ។ ក្នុងនេះដែរដំបូងឡើយ Barcelona តាមទិញ Philippe Coutinho ពី Liverpool ប៉ុណ្ណោះ តែត្រូវបានបដិសេធជាច្រើនលើកច្រើនសារ។ យ៉ាងណាវិញ ចំពោះ ការតាមប្រមាញ់ Dembele ក្រុម Barcelona ធ្លាប់ទទួលរងការបដិសេធ ផងដែរ។ ជាក់ស្តែងណាស់ ប៉ុន្មានថ្ងៃមុននេះ Dortmund បានបដិសេធ មិនលក់ ខ្សែប្រយុទ្ធបារាំងរូបនេះ ក្នុងតម្លៃ ១២០លានអឺរ៉ូ។ ក៍ប៉ុន្តែ នៅពេលនេះ ក្រុម Dortmund មិនរុញរា ក្នុងការលក់ Ousmane Dembele ឡើយ ដោយសារតែតម្លៃខ្លួនកើនឡើងដល់ទៅ​១៥០លានអឺរ៉ូ។

សូមរំលឹកផងដែរថា ក្រុម Dortmund បានទិញ Dembele ពីក្រុម Rennes របស់បារាំង ក្នុងតម្លៃ ២០លានអឺរ៉ូ ដូច្នេះហើយ ការលក់វិញ ក្រោយពីលេងបាន ១ឆ្នាំ បានដល់ទៅ ១៥០លានអឺរ៉ូ គឺជាការចំណេញកប់ក្តោងមួយរបស់ក្រុម Dortmund ។ ម្យ៉ាងវិញទៀតនោះ Dembele និងក្លាយជាកីឡាករដែលទិញចូលថ្លៃជាងគេ ក្នុងប្រវត្តិសាស្ត្ររបស់ក្រុម Barcelona ផងដែរ។