នាពេលកន្លងមក ខ្សែប្រយុទ្ធអ៊ុយរ៉ាហ្គាយ Edinson Cavani បានបដិសេធ សំណើរ ១លានអឺរ៉ូរបស់ក្រុម Paris Saint Germain ក្នុងការប្រគល់តួនាទីទាត់បាល់​ ១១ម៉ែត្រឲ្យទៅខ្សែប្រយុទ្ធប្រេស៊ីល Neymar ខណៈកីឡាកររូបនេះ នៅតែបន្តបង្ហាញខ្លួន បានយ៉ាងល្អឲ្យក្រុម Paris Saint Germain ដដែល។

បើតាមការចុះផ្សាយរបស់ Mundo Deportivo បានឲ្យដឹងថា ការបដិសេធ ១លានអឺរ៉ូ នេះ Cavani កំពុងតែសម្លឹងឃើញក្រុមតោខៀវ Chelsea ដែលកំពុងតែចាប់អារម្មណ៍ចង់បាន កីឡាកររូបនេះយ៉ាងខ្លាំង។ ជាក់ស្តែងណាស់​ Chelsea ពិតជាចង់បានខ្សែប្រយុទ្ធអ៊ុយរ៉ាហ្គាយរូបនេះយ៉ាងខ្លាំង ព្រោះថា Cavani មានភាពរឹងមាំ និងពូកែស៊ុតបាល់ទាំងជិត និងឆ្ងាយ។ Chelsea ធ្លាប់បានចាប់អារម្មណ៍ Cavani​ តាំងពីឆ្នាំ ២០១២​ និង ២០១៣​មកម្លេះ តែក្លិបអង់គ្លេសនេះ មិនទទួលបានជោគ​ជ័យឡើយ បន្ទាប់ពី Cavani បានសម្រេចចិត្តទៅចូលរួមជាមួយក្រុម Paris Saint Germain ។

យ៉ាងណាវិញ ក្រោយពីកើតមានជម្លោះបន្តិច​បន្តួច​ ជាមួយ Neymar និងការអាក់អន់ស្រពន់ចិត្តរបស់ Cavani រួចមក Chelsea បានសម្លឹងឃើញឱកាសក្នុងការ ចង់បានកីឡាករវ័យ ៣០ឆ្នាំរូបនេះឡើងវិញ។ Chelsea នឹងព្យាយាម ប្រមាញ់ Cavani នៅទីផ្សារដោះដូរកីឡាករ​នា​ខែមករាខាងមុខនេះ ដើម្បីយកមកចាប់ដៃគូជាមួយខ្សែប្រ​យុទ្ធអេស្ប៉ាញកំពុងឡើងជើង Alvaro Morata នាពេលខាងមុខនេះ។ ជាងនេះទៅទៀត បើនិយាយពី Cavani វិញ ក៍ដូចជាពេញចិត្ត ចំពោះការផ្លាស់មកកាន់ Chelsea យ៉ាងខ្លាំង ស្របពេលរូបគេបានការបដិសេធ មិនទទួលទឹកប្រាក់ ១លានអឺរ៉ូនេះដែរ ប្រហែលជា Edinson Cavani ចង់ផ្លាស់មកកាន់ Chelsea ទេដឹង។

ដូច្នេះហើយ ប្រសិនបើ Cavani ពិតជាផ្លាស់មកកាន់ Chelsea មែននោះ នោះប្រព័ន្ធប្រយុទ្ធដែលមាន Cavani​និង Morata ពិតជាកក្រើក Premier League ជាក់ជាមិនខានឡើយ។