ខ្សែប្រយុទ្ធប្រេស៊ីល Neymar កំពុងតែរៀបជើងព្រួល ក្នុងការផ្លាស់ទៅកាន់ក្រុមអធិរាជស Real Madrid ប្រសិនបើរូបគេបានឈ្នះពានជាមួយក្រុម Paris Saint Germain ហើយនោះ។

បើតាមការចុះផ្សាយរបស់ The Goal បានឲ្យដឹងថា ខ្សែប្រយុទ្ធឆ្នើម Neymar នឹងមិនបន្តលេងឲ្យក្រុម Paris Saint Germain យូរអង្វែងឡើយ។ ជាការពិតណាស់​ ការចាកចេញទៅកាន់ Paris Saint Germain នារដូវក្តៅកន្លងមក Neymar​ ចង់គេចចេញពីស្រមោល​របស់ Lionel Messi​ ប៉ុណ្ណោះ។ យ៉ាងណាវិញ Neymar បានឲ្យដឹងតាម The Goal ថា រូបគេនឹងផ្លាស់ទៅកាន់​ក្រុម​ស្តេចស Real Madrid នៅក្នុងពេលដ៍ខ្លីខាងមុខនេះ ប្រសិនបើគេអាចជួយ​ Paris Saint Germain ឲ្យឈ្នះ Champion League នោះ។ ម្យ៉ាងវិញទៀតនោះ គឺ រូបគេចង់ឈ្នះ Balon D’Or ដែលការអាចជួយក្រុម Paris Saint Germain ឲ្យឈ្នះ Champion League ប្រៀបដូចជាអាចធ្វើឲ្យរូបគេ ឈ្នះ Balon D’Or ផងដែរ។

ប្រភពខាងលើដដែល បានឲ្យដឹងបន្ថែមទៀតថា Neymar នឹងមិនផ្លាស់ទៅ Real Madrid ឡើយ ប្រសិនបើរូបគេមិនអាចជួយ Paris Saint Germain ឈ្នះពាននោះ បើទោះបីត្រូវរង់ចាំ ២-៣ រដូវកាលក៍ដោយ ព្រោះថាកីឡាករប្រេសីលរូបនេះ មកកាន់បារាំង ដើម្បីឈ្នះពាន Champion League បើមិនឈ្នះគឺមិនចាកចេញឡើយ។ យ៉ាងណាវិញ នេះគ្រាន់តែជាការប្តេជ្ញាប៉ុណ្ណោះ ខណៈការពិតនៅមិនទាន់​ច្បាស់ឡើយ ស្របពេលដែល Paris Saint Germain មិនប្រាកដថាអាចឈ្នះ Champion League ឡើយ ចំណែកនៅ Real Madrid វិញ ទើបមានសង្ឃឹមខ្ពស់ក្នុងការឈ្នះពានកំពូលរបស់អឺរ៉ុបមួយ​នេះ។ ដូច្នេះហើយ រង់ចាំមើលថា តើ Neymar ពិតជាធ្វើដូចសម្តីរបស់ខ្លួន ឬយ៉ាងណា?