ខ្សែប្រយុទ្ធ Neymar បានបញ្ជាក់ថារូបគេមិនផ្លាស់ប្ដូរការលេងរបស់ខ្លួនទេ បើទោះជាទើបតែត្រូវមួយកែងរបស់កីឡាករ Yasmani Duk របស់បូលីវី ក្នុងការប្រកួតជម្រុះ World Cup នៅតំបន់អាហ្វ្រិកខាងត្បូងកន្លងទៅក៏ដោយ។

អំឡុងការប្រកួតដែលប្រេស៊ីលបានយកឈ្នះក្រុមបូលីវី ៥-០ កន្លងទៅនេះ ខ្សែប្រយុទ្ធ Neymar លេងបានតែ៦៣នាទីប៉ុណ្ណោះ ក៏ត្រូវប្ដូរចេញ ព្រោះត្រូវមួយកែងរបស់កីឡាករ Yasmani Duk បណ្ដាលឱ្យបែកឈាមពេញមុខ មិនអាចបន្ដលេងបាន។ ក្រោយពីរងរបួសនោះភ្លាម កីឡាករវ័យក្មេងរបស់ប្រេស៊ីលរូបនេះ ក៏ត្រូវ Barcelona នាំយកព្យាបាលនៅអេស្ប៉ាញវិញភ្លាមដែរ។

ដោយរបួសមិនសូវជាធ្ងន់ធ្ងរ Neymar នឹងអាចចូលលេងបានវិញហើយនៅក្នុងការប្រកួត La Liga នៅសប្ដាហ៍នេះ ហើយរូបគេនិយាយថាខ្លួននៅតែរក្សាការលេងនិងចង្វាក់ញាក់បាល់របស់ខ្លួនដូចមុនដដែល មិនមានអ្វីផ្លាស់ប្ដូរទេ។

“ខ្ញុំអត់ដូរទេ ការលេងរបស់ខ្ញុំ។ អ្នកត្រូវដឹងថាពេលខ្ញុំនៅលើទីលាន ខ្ញុំមានវិធីដែលខ្ញុំត្រូវលេងហើយចង្វាក់នៃការលេងនោះ គឺព្យាយាមញាក់កេចខ្សែការពារដើម្បីស្វែងរកគ្រាប់បាល់ឱ្យក្រុម។ ខ្ញុំសប្បាយចិត្តចំពោះការលេងដូច្នេះ ហើយក៏មិនខ្លាចចំពោះរបួសនោះដែរ”។ សម្ដី Neymar ៕