ក្រុមហ៊ុន Samsung ទើបទទួលបានការយល់ព្រមពីរដ្ឋាភិបាលនៃប្រទេសកូរ៉េខាងត្បូង ឱ្យអាចសាកល្បងរថយន្តស្វ័យបើកបរនៅលើដងផ្លូវ ហើយនេះ គឺជារឿងដ៏គួរឱ្យភ្ញាក់ផ្អើលមួយ ដែលក្រុមហ៊ុនបច្ចេកវិទ្យាយក្សអាស៊ី កំពុងឈានជើងចូលក្នុងទីផ្សារនៃប្រព័ន្ធបច្ចេកវិទ្យាស្វ័យប្រវត្តិកម្មបំពាក់លើយានយន្ត តាមពីក្រោយក្រុមហ៊ុន Apple។

សេចក្តីប្រកាសព័ត៌មាននេះ គឺធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពី រថយន្តដែលគេជឿថាបំពាក់ប្រព័ន្ធស្វ័យបើកបររបស់ក្រុមហ៊ុនបច្ចេកវិទ្យាយក្សអាមេរិក ត្រូវគេប្រទះឃើញដាក់សាកល្បងកាលពីសប្តាហ៍មុន នៅទឹកដីនៃរដ្ឋកាលីហ្វ័រនីយ៉ា សហរដ្ឋអាមេរិក។

យោងតាមរបាយការណ៍ពីទីភ្នាក់ងារព័ត៌មាន The Korean Herald បានឱ្យដឹងថា ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន របស់សាធារណរដ្ឋកូរ៉េ បានផ្តល់ភ្លើងខៀវដល់ក្រុមហ៊ុន Samsung ដើម្បី​បើកផ្លូវឱ្យក្រុមហ៊ុនជាងគេធំបំផុតក្នុងប្រទេសមួយនេះ ចាប់ផ្តើមធ្វើការតេស្តរថយន្ត Hyundai ដែលមានបំពាក់ប្រព័ន្ធចាប់​​សញ្ញា និងកាមេរ៉ា ភ្ជាប់ជាមួយប្រព័ន្ធកម្មវិធីគ្រប់គ្រងការបើកបរដោយស្វ័យប្រវត្តិរបស់ក្រុមហ៊ុននៅតាមដងផ្លូវនានា។

គួរបញ្ជាក់ថា ក្នុងចំណោមក្រុមហ៊ុនបច្ចេកវិទ្យាធំៗ Samsung គឺជាក្រុមហ៊ុនចុងក្រោយគេហើយដែលកំពុងត្រៀមខ្លួនឈានចូលក្នុងទីផ្សាររថយន្តប្រព័ន្ធស្វ័យបើកបរ ប៉ុន្តែ វត្តមានរបស់ក្រុមហ៊ុនអេឡិចត្រូនិកយក្សនេះ នឹងធ្វើឱ្យការប្រកួតប្រជែងមានសភាពកាន់តែពុះកញ្រ្ជោលឡើងថែមមួយកម្រិតទៀត​ នាថ្ងៃអនាគត៕

ប្រភពព័ត៌មានៈ techcrounch