ក្រោយពីបែកធ្លាយព័ត៌មានចចាមអារ៉ាមកាលពីសប្តាហ៍មុនមក ក្រុមហ៊ុន LG នៅថ្ងៃម្សិលមិញបានប្រកាសជាផ្លូវការនូវវត្តមានទូរសព្ទលំដាប់ថ្នាក់កណ្តាលស៊េរី Q6 ចំនួន ៣ ម៉ូឌែល ដែលវាត្រូវគេស្គាល់ថាជា G6 ខ្នាតកណ្តាល។
យោងតាមក្រុមហ៊ុនអេឡិចត្រូនិច LG នេះគឺជាផ្តល់ជូនជាលើកដំបូងហើយរបស់ក្រុមហ៊ុន នូវជម្រើសទូរសព្ទដៃលំដាប់ថ្នាក់កណ្តាលថ្មី ដែលបំពាក់មកជាមួយលក្ខណ:សម្បត្តិកម្រិតខ្ពស់ និងមានតម្លៃប្រកួតប្រជែងដ៏ល្អប្រសើរមួយ។
សែស្រឡាយ Q6 ក៏មិនខុសពី G6 ប៉ុន្មានដែរ ពោលគឺ វាបំពាក់អេក្រង់ FullVision ស្ទើរគ្មានស៊ុម និងប្រើខ្នាត ១៨:៩ (បណ្តោយ ១៨ អីុញ, ទទឹង ៩ អីុញ) ដែលផ្តល់នូវការទស្សនាវីដេអូ ឬខ្សែភាពយន្តផ្សេងៗកាន់តែជក់ចិត្ត។
LG Q6 ត្រូវបានផលិតចេញជា ៣ ម៉ូឌែល រួមមាន Q6+, Q6, និង Q6a។ ម៉ូឌែលទាំងបី មានលក្ខណ:សម្បត្តិខុសគ្នាតែទៅលើ RAM, ROM (អង្គចងចាំជាប់ម៉ាស៊ីន) និងលក្ខណ:ពណ៌ប៉ុណ្ណោះ ពោលគឺ Q6+ បំពាក់ RAM/ ROM ទំហំ ៤/៦៤ ជីហ្គាបៃយ៍ មានជម្រើសពណ៌ ខ្មៅ ផ្លាទីន និងខៀវ, Q6 បំពាក់ RAM/ROM ទំហំ ៣/៣២ ជីហ្គាបៃយ៍ មានជម្រើសពណ៌ ខ្មៅ ផ្លាទីន ស និងមាស, និង Q6a បំពាក់ RAM/ROM ទំហំ ២/១៦ ជីហ្គាបៃយ៍ មានជម្រើសពណ៌ ខ្មៅ ផ្លាទីន និងមាស។
ក្រៅពីនេះពួកវាទាំងបី សុទ្ធតែប្រើអេក្រង់ FHD+ ទំហំ ៥.៥ អីុញ មានខ្នាតបញ្ចាំងរូបភាព ១០៨០x២១៦០ ភិចសែល គាំទ្រប្រតិបត្តិការដោយបន្ទះឈីប Snapdragon 435 ជំនាន់ Octa-core និង GPU ជំនាន់ Adreno 505។
ចំណែកកាមេរ៉ាក្រោយមានទំហំ ១៣ មេហ្គាភិចសែល ហើយកាមេរ៉ាមុខទំហំ ៥ មេហ្គាភិចសែល អាចចាប់យករូបភាពក្នុងមុំ ១០០ ដឺក្រេ អមដោយប្រព័ន្ធថតសម្គាល់ផ្ទៃមុខសម្រាប់ដោះសោរហ័ស។ ដោយឡែក LG Q6 គឺដើរដោយថ្មថាមពល ៣,០០០ មីល្លីអំព៊ែរ និងប្រព័ន្ធ Android Nougaht ជំនាន់ចុងក្រោយ ដំឡើងរួចជាស្រេចចេញពីរោងចក្រ។
តាមការប្រកាសពីក្រុមហ៊ុន Q6 ទាំងបីម៉ូឌែល នឹងចាប់ផ្តើមចែកចាយលក់នៅលើទីផ្សារគោលដៅតំបន់អាស៊ី ក្នុងខែសីហា បន្ទាប់មក វានឹងចេញលក់នៅតំបន់អឺរ៉ុប អាមេរិចឡាទីន និងអាមេរិកខាងជើង។ ចំពោះតម្លៃវិញ គឺពុំទាន់ត្រូវបានប្រកាសឱ្យដឹងនៅឡើយទេ គិតមកទល់ពេលនេះ៕
ប្រភពព័ត៌មាន phonearena
មតិយោបល់