យោងតាមរបាយការណ៍ថ្មីមួយពីប្រទេសកូរ៉េបានឱ្យដឹងថា ក្រុមហ៊ុន LG Innotek របស់ក្រុមហ៊ុន LG នឹងចូលខ្លួនជួយក្រុមហ៊ុន Apple លើការផ្គត់ផ្គង់គ្រឿងបង្គុំចាំបាច់មួយចំនួនសម្រាប់មុខងារ Face ID ដែលត្រូវគេរំពឹងថា នឹងបំពាក់លើ iPhone រួមទាំង iPad ស៊េរីឆ្នាំ ២០១៨។

នៅក្នុងកិច្ចព្រមព្រៀងថ្មីមួយធ្វើឡើងរវាងក្រុមហ៊ុនទាំងពីរ​ LG Innotek នឹងទទួលរ៉ាប់រងផលិតនូវសមាធាតុផ្សំសម្រាប់មុខងារ​ស្គេនមុខ 3D ឱ្យក្រុមហ៊ុន Apple មួយចំនួន ជាអាទិ៍ បន្ទះ Sensor ចាប់យកទម្រង់ផ្ទៃមុខ 3D។​

យោងតាម The Investor ក្រុមហ៊ុនបុត្រសម្ព័ន្ធរបស់ក្រុមហ៊ុនអេឡិចត្រូនិក LG មួយនេះ នឹងបោះទុន ៨២១​ លានដុល្លារ សម្រាប់កសាងទីកន្លែងបន្ថែមសម្រាប់ផលិតសមាសភាគទាំងនោះ ក្រោមការគាំទ្រហិរញ្ញវត្ថុពីក្រុមហ៊ុន Apple។

មុននេះប៉ុន្មានសប្តាហ៍ផងដែរ Apple ក៏បានចុះកិច្ចព្រមព្រៀងតម្លៃ ៣៩០​ លានដុល្លារ ជាមួយក្រុមហ៊ុនផលិតសមាសភាគគមនាគមន៍អ៊ុបទិក​ Finisar ដែលមានមូលដ្ឋាននៅសហរដ្ឋអាមេរិក។ សកម្មភាពទាំងនេះ ត្រូវគេជឿថា Apple ធ្វើឡើងដើម្បីបញ្ជៀសបញ្ហាយឺតយ៉ាវក្នុងការផលិតសមាសភាគផ្សំ Face ID ដែលបានកើតឡើងនាពេលកន្លងមកចំពោះ iPhone X។

គួររំឭកថា កន្លងមកមានព័ត៌មានចចាមអារ៉ាមជាច្រើនលើកឡើងថា Apple នឹងផលិតចេញទូរសព្ទ iPhone ចំនួន ៣ ម៉ូឌែល ដែលមានរចនាបទ និងមុខងារ Face ID ដូចជា iPhone X នៅឆ្នាំ ២០១៨ នេះ។ ជាមួយគ្នានោះ iPad ម៉ូឌែលខ្ពស់ក៏ត្រូវគេរំពឹងថា នឹងបំពាក់មុខងារស្គេនផ្ទៃមុខ 3D ដូចជា iPhone អីចឹងដែរ៕

ប្រភពព័ត៌មាន: BGR