អាមេរិកៈ ប្រធានាធិបតីជិតផុតអាណត្តិអាមេរិក លោក បារ៉ាក់ អូបាម៉ា បានផ្ដាច់ជ្ញាថា នឹងចាត់វិធានការប្រឆាំងនឹងរុស្ស៊ី ចំពោះការលួចចូលក្នុងប្រព័ន្ធកុំព្យូទ័ររបស់ទីក្រុងម៉ូស្គូ នៅក្នុងយុទ្ធនាការបោះឆ្នោតប្រធានាធិបតីអាមេរិក។ នេះបើយោងតាមរយៈ សារព័ត៌មាន BBC ចេញផ្សាយនៅថ្ងៃទី១៦ ខែធ្នូ ឆ្នាំ២០១៦។
លោកបានថ្លែងនៅស្ថានីយវិទ្យុ NPR អាមេរិកថា «យើងត្រូវចាត់វិធានការ និងធ្វើសកម្មភាពប្រឆាំងវា» ។
ប្រទេសរុស្ស៊ី ត្រូវបានអាមេរិកចោទប្រកាន់ថា បានលួចស្តាប់អ៊ីម៉ែលនៃគណបក្សប្រជាធិបតេយ្យ និងព័ត៌មានយុទ្ធសាស្ត្រសំខាន់ៗ របស់លោកស្រីហ៊ីល ឡារីគ្លីនតុន ដែលជុំវិញបញ្ហានេះ ត្រូវបានខាងវិមានក្រឹមឡាំង ធ្វើការបដិសេធយ៉ាងខ្លាំងផងដែរ។
ជាការឆ្លើយតបពាក់ព័ន្ធនឹងរឿងខាងលើ ប្រធានាធិបតីជាប់ឆ្នោតអាមេរិក ខាងគណបក្សសាធារណរដ្ឋ លោក Donald Trump បានច្រានចោលពាក្យបណ្តឹងនេះ ដោយចាត់ទុកថា ជារឿងដ៏គួរឲ្យអស់សំណើចណាស់ និងមិនសមហេតុផលនយោបាយនោះទេ។
លោក Trump បានលើកទ្បើងនៅលើបណ្តាញសង្គម Twitter ថា «ប្រសិនបើរុស្ស៊ី ឬអង្គភាពផ្សេងទៀត បានលួចចូលក្នុងប្រព័ន្ធកុំព្យូទ័រ ហេតុអ្វីបានជាសេតវិមានរង់ចាំយូរម្ល៉េះ ទម្រាំចាត់វិធានការ? ហេតុអ្វីបានជាពួកគេទើបតែចាត់វិធានការ ក្រោយពេលដែលលោកស្រីហ៊ីលចាញ់ទៅវិញ ។
គួរបញ្ជាក់ដែរថា ទីភ្នាក់ងារស៊ើបការណ៍សម្ងាត់ FBI បាននិយាយថា ពួកគេមានភស្តុតាងមិនអាចប្រកែកបាន ដែលថា រុស្ស៊ីពិតជាមានការជាប់ពាក់ព័ន្ធនឹងលួចចូល ក្នុងប្រព័ន្ធកុំព្យូទ័រ នៅក្នុងយុទ្ធនាការបោះឆ្នោត ប្រធានាធិបតីអាមេរិកមែន៕
មតិយោបល់