អាមេរិក៖ អង្គការសិទ្ធិមនុស្ស Human Rights Watch បានចេញរបាយការណ៍ប្រចាំឆ្នាំរបស់ខ្លួនដែលបានចេញផ្សាយកាលពីថ្ងៃព្រហស្បតិ៍ ដែលសំដៅដល់ការជាប់ឆ្នោតរបស់លោកត្រាំជាប្រធានាធិបតីសហរដ្ឋអាមេរិក រួមជាមួយការងើបឡើងនូវពួកអ្នកនយោបាយគិតតែពីប្រជាប្រិយភាពនៅតំបន់អឺរ៉ុប ដែលជាការគំរាមកំហែងដ៏ធ្ងន់ធ្ងរមួយដល់លទ្ធិប្រជាធិបតេយ្យបច្ចិមប្រទេស ហើយនិងតម្លៃនៃប្រព័ន្ធលទ្ធិប្រជាធិបតេយ្យក្នុងសកលលោកទាំងមូល។ នេះបើយោងតាមរយ:សារព័ត៌មាន BBC ចេញផ្សាយនៅថ្ងៃទី១៤ ខែមករា ឆ្នាំ២០១៧។
នាយកប្រតិបត្តិនៃអង្គការសិទ្ធិមនុស្ស Human Rights Watch លោក Kenneth Roth បានសរសេរថា ប្រធានាធិបតីជាប់ឆ្នោតសហរដ្ឋអាមេរិក ដូណាល់ ត្រាំ និងពួកអ្នកនយោបាយនៅអឺរ៉ុបស្វះស្វែងរកការកាន់អំណាចតាមរយ:ការអំពាវនាវឲ្យមានការប្រកាន់ពូជសាសន៍ ការស្អប់ខ្ពើមជនបរទេស និងការស្អប់ខ្ពើមស្រីៗ។ពួកអ្នកនយោបាយទាំងអស់នោះអះអាងថា សាធារណជនសុខចិត្តទទួលយកការរំលោភសិទ្ធិមនុស្សជាការចាំបាច់ដើម្បីការពារការងារ បញ្ចៀសការផ្លាស់ប្តូរវប្បធម៌ ឬរារាំងការវាយប្រហារភេរវកម្ម។ តាមការពិត វាជាការបដិសេធមិនទទួលយកសិទ្ធិមនុស្សដែលទំនងឆ្ពោះទៅកាន់អំណាចផ្តាច់ការ។
ក្នុងរបាយការណ៍ដែលមានជាង៧០០ទំព័រដែលនិយាយលម្អិតពីការអនុវត្តសិទ្ធិមនុស្សនៅក្នុងប្រទេសជាង៩០ បានអះអាងថា លោកប្រធានាធិបតីជាប់ឆ្នោត ដូណាល់ ត្រាំ បានឡើងកាន់អំណាចតាមរយ:ការបង្កការស្អប់ខ្ពើម និងការមិនអត់ឱន ហើយរបាយការណ៍នោះបានប្រាប់ឲ្យដឹងទៀតថា ការជាប់ឆ្នោតរបស់លោកត្រាំឆ្លុះបញ្ចាំងការដឹកនាំបែបមនុស្សខ្លាំងដែលបានឃើញនៅក្នុងប្រទេសនានាដូចជាចិន និងរុស្ស៊ី។
សូមជំរាបថា លោក ដូណាត្រាំ នឹងចូលកាន់តំណែងប្រធានាធិបតីអាមេរិក នៅថ្ងៃទី២០ ខែមករា ឆ្នាំ២០១៧ ខាងមុខ៕
មតិយោបល់