ប្រេស៊ីលៈ ប្រធានាធិបតីលោក Michel Temer ត្រូវបានអគ្គរដ្ឋអាជ្ញាក្នុងប្រទេស ចោទប្រកាន់ពីបទប្រព្រឹត្តអំពើពុករលួយ ដោយការទទួលយកសំណូក ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២៧ ខែមិថុនា ឆ្នាំ ២០១៧។

លោក Temer ត្រូវបានគេចោទប្រកាន់ពីបទទទួលប្រាក់ពីប្រធានក្រុមហ៊ុនវិចខ្ចប់សាច់សត្វដ៏ធំមួយ ជុំវិញរឿងអាស្រូវអំពើពុករលួយ ខណៈដែលលោកបានបដិសេធថា មិនបានប្រព្រឹត្តទង្វើខុសអ្វីទ្បើយ។

ការចោទប្រកាន់នេះ ត្រូវបានគេបញ្ជូនទៅកាន់ចៅក្រមតុលាការកំពូល ដើម្បីសម្រេចថាតើករណីនេះ អាចនឹងត្រូវបញ្ជូនទៅកាន់សភាជាន់ទាបបានដែរឬយ៉ាងណា។

បន្ទាប់មកទៀត សភាជាន់ទាប នឹងបោះឆ្នោតសម្រេចថាតើលោកប្រធានាធិបតី Temer អាចត្រូវបានកាត់ទោសដែរឬទេ។

ពាក់ព័ន្ធនឹងបញ្ហានេះដែរ លោក Temer បានប្តេជ្ញាថា នឹងបង្ហាញភាពគ្មានទោសពៃរ៍របស់លោក បន្ទាប់ពីការទទួលរងនូវការចោទប្រកាន់ជាច្រើន ចាប់តាំងពីលោកបានឡើងកាន់តំណែងកាលពីឆ្នាំមុន។

គួរបញ្ជាក់ដែរថា លោក Temer ត្រូវគេរំពឹងថា នឹងប្រឈមមុខចំពោះការចោទប្រកាន់បន្ថែមទៀត នៅសប្តាហ៍ខាងមុខ បើទោះបីលោកមានប្រជាប្រិយភាពយ៉ាងខ្លាំង នៅក្នុងប្រទេសក៏ដោយ ប៉ុន្តែគណបក្សស្តាំនិយមរបស់លោក អាចគ្រប់គ្រងរដ្ឋបាលបាន ជាផ្នែកមួយនៃសម្ព័ន្ធមិត្ត៕