កែបៈ យោងតាមហ្វេសប៊ុករបស់ក្រសួងធនធានទឹក និងឧតុនិយម ចេញផ្សាយនៅរសៀលថ្ងៃទី២៥ ខែឧសភា ឆ្នាំ២០១៦នេះ បានបង្ហាញឲ្យដឹងថា ជំនន់ទឹកភ្លៀង បានធ្វើឲ្យប៉ះពាល់ដល់ថ្នាលសំណាបរបស់បងប្អូនប្រជាកសិករ និងស្ពានមួយកន្លែង ស្ថិតនៅក្នុងភូមិកែវក្រសាំង សង្កាត់កែប ក្រុងកែប ខេត្តកែប។

ករណីនេះដែរ នៅក្នុងពិធីចែកសញ្ញាបត្រដល់និស្សិតបញ្ចប់ការសិក្សា នៃសាកលវិទ្យាល័យអាស៊ីអឺរ៉ុប នៅវិទ្យាស្ថានអប់រំ នាព្រឹកថ្ងៃទី២៥ ខែឧសភានេះ សម្តេច ហ៊ុន សែន បានស្នើឲ្យមន្ត្រីពាក់ព័ន្ធទាំងអស់ ត្រូវបង្កើនសកម្មភាពឲ្យកាន់តែខ្លាំងថែមទៀត ដើម្បីទប់ស្កាត់បញ្ហាគ្រោះធម្មជាតិ ដែលអាចបង្កឲ្យមានផលវិបាកនៅពេលក្រោយ។

សម្តេច ហ៊ុន សែន បានលើកឡើងថា “សាលារៀន និងមន្ទីរពេទ្យ គឺត្រូវតែជាគោលដៅអាទិភាពមុនគេ នៃការធ្វើឡើងវិញ ដោយមិនអាចទុកឲ្យកូនសិស្សមកសាលារៀន ឬមិនអាចទុកឲ្យមន្ទីរពេទ្យអត់មានសកម្មភាពនៅពេលមានផលប៉ះពាល់ ដោយសារខ្យល់កន្ត្រាក់ ក្នុងរយៈពេលកន្លងទៅនោះទេ”។

ត្រង់ចំណុចនេះសម្តេច ហ៊ុន សែន បានស្នើឲ្យអាជ្ញាធរមានការយកចិត្តទុកដាក់ចំពោះប្រជាពលរដ្ឋ ដែលទទួលផលប៉ះពាល់ នៃការបាក់ផ្ទះសម្បែង ព្រោះពេលខ្លះក្នុង១ថ្ងៃ ខ្យល់កន្ត្រាក់អាចបំផ្លាញផ្ទះ រហូតដល់ទៅរាប់រយខ្នងឯណោះ៕