ដូចតាមការគ្រោងទុក ក្រុមហ៊ុន Huawei ថ្ងៃម្សិលមិញនេះ បានប្រកាសចេញជាផ្លូវការនូវទូរសព្ទដៃជំនាន់ថ្មី Huawei P10/ ​P10 Plus របស់ខ្លួន នៅឯព្រឹត្តិការណ៍ WMC នាទីក្រុង Barcelona ប្រទេសអេស្ប៉ាញ ជាមួយជម្រើសពណ៌ខុសៗគ្នារហូតដល់ទៅ ១០។

មិនខុសពីព័ត៌មានបែកធ្លាយកន្លងមកប៉ុន្មាន P10 និង P10 Plus បំពាក់បច្ចេកវិទ្យាកាន់តែខ្ពស់ ហើយមានកាមេរ៉ាភ្លោះនៅផ្នែកខាងក្រោយ អមដោយបច្ចេកវិទ្យា Leica ដូចគ្នា ដោយម្ខាងទំហំ ២០ មេហ្គាភិចសែល និងម្ខាងទៀតទំហំ ១២​ មេហ្គាភិចសែល។

ដោយឡែក ម៉ូឌែល Plus មានភ្នែកកាមេរ៉ាសម្រាប់ ចាប់យករូបភាពក្នុងទីដែលមានពន្លឺខ្សោយទំហំ f/2.2 ធំជាងម៉ូឌែលធម្មតា ដែលមានទំហំ f/1.8 អាចចាប់យករូបភាពបានកាន់តែលម្អិត និងកាន់តែច្បាស់ក្នុងទីដែលមានពន្លឺទាប ហើយថែមទាំងមានភ្ជាប់មកជាមួយមុខងារ Portrait Mode ដូច iPhone 7 Plus ផងដែរ។

ក្រុមហ៊ុន Huawei មិនបានពង្រីកអេក្រង់ទូរសព្ទត្រកូល P នេះ ឱ្យធំជាងមុននោះទេ ពោលគឺ វានៅតែរក្សាទំហំ ៥.១ អីុញ និង ៥.៥ អីុញ សម្រាប់ P10 និង P10 Plus ដដែល ប៉ុន្តែ ម៉ូឌែលទាំងពីរពាំនាំមកជាមួយបច្ចេកវិទ្យាការពារជម្រាបទឹក សាកថ្មរហ័សពេញ (តាមការប្រកាសរបស់ក្រុមហ៊ុន ប្រើពេលសាកត្រឹមតែ ៣០ វាអាចប្រើបានមួយថ្ងៃពេញ) ហើយបន្ទះស្គេនក្រយៅដៃរបស់វា ត្រូវបានផ្លាស់ទីតាំងមកខាងមុខ ដើម្បីជំនួសប៊ូតុងគ្រប់គ្រងរបស់ប្រព័ន្ធ Android ដោយគេអាចប្រើម្រាមដៃប៉ះលើ ឬអូសមកឆ្វេង/ស្តាំ ជំនួសប៊ូតុង Navigation បាន។

Huawei P10/ P10 Plus ត្រូវបានប្រកាសចេញជាមួយតម្លៃខ្ពស់ជាងម៉ូឌែលមុនរបស់វា ដោយ P10 មានតម្លៃ ៦៨៥ ដុល្លារ ឯ P10 Plus មានតម្លៃ ៧៣៨ ដុល្លារ ហើយម៉ូឌែលទាំងពីរ នឹងចាប់ផ្តើមចេញលក់នៅប្រទេសក្នុងតំបន់អឺរ៉ុប ម៉ាឡេស៊ី ម៉ិចស៊ិច អូស្រ្តាលី នូវែលហ្សឺឡង់ និងប្រទេសមួយចំនួនផ្សេងទៀត ក្នុងខែមិនា ខាងមុន៕

ប្រភពព័ត៌មាន: theverge, techcrunch