ទូរសព្ទដៃបំពាក់បន្ទះស្គេនក្រយៅដៃលើកញ្ចក់អេក្រង់មុនដំបូងគេ ដែលពិភពលោកកំពុងរងចាំ អាចមិនមែនជា​របស់​ក្រុមហ៊ុន Apple ឬ Samsung ទេ តែវាអាចនឹងជារបស់ក្រុមហ៊ុន Vivo។

ការលើកឡើងបែបនេះ គឺបន្ទាប់ពីក្រុមហ៊ុនផលិតទូរសព្ទដៃរបស់ចិន ដែលទើប​ឈាន​ជើងចូលប្រឡូកក្នុងទីផ្សារឧបករណ៍ចល័ត បានបង្ហោះសារមួយលើទំព័រ Twitter ផ្លូវការរបស់ខ្លួនឈ្មោះ Vivo India ជាមួយរូបភាពឱ្យតម្រុយមួយ ដែលមើលទៅស្រដៀងនឹងស្នាមក្រយៅដៃផុសឡើងលើស្រទាប់អ្វីមួយ អមជាមួយសារ “Unlock the Future” ឬប្រែថា “ដោះសោអនាគត” និង “WMC 2017- Shanghai” ដែលបញ្ជាក់ថា ខ្លួននឹងមានអ្វីមួយបើកបង្ហាញឡើងក្នុងព្រឹត្តិការណ៍ World Mobile Congress (សមាជទូរសព្ទចល័តពិភពលោក) ប្រព្រឹត្តឡើងពីថ្ងៃទី ២៨ មិថុនា ដល់ថ្ងៃទី ០១ កក្កដា នាទីក្រុងសៀងហៃ ប្រទេសចិន។

សារ Twitter ផ្លូវការណ៍ថ្មីនេះ គឺត្រូវបានបង្ហោះឡើងបន្ទាប់ពីវីដេអូបង្ហាញពីទូរសព្ទ Vivo ចម្លែកមួយត្រូវបានបែកធ្លាយនៅលើទំព័របណ្តាញទំនាក់ទំនងសង្គម Weibo របស់ចិន និងត្រូវបានគេហទំព័រ Android Authority យកមកចុះផ្សាយ។

កន្លងមកនេះ ក្រុមហ៊ុនផលិតទូរសព្ទដៃដ៏ល្បីល្បាញរបស់អាមេរិក និងកូរ៉េខាងត្បូង ពោលគឺ Apple និង Samsung ត្រូវបានប្រភពក្រៅផ្លូវការនានាថា នឹងពាំនាំមកនូវបច្ចេកវិទ្យាស្កេនក្រយៅដៃបំពាក់លើស្រទាប់កញ្ចក់អេក្រង់។

ប៉ុន្តែ រហូតមកទល់ពេលនេះ វាកំពុងឋិតក្នុងភាពស្រពិចស្រពិលនៅឡើយ ដោយប្រភពខ្លះថា ក្រុមហ៊ុនយក្សទាំងពីរ កំពុងជួបឧបសគ្គក្នុងការច្របាច់បញ្ចូលអង្គញាណស្គេនក្រយៅដៃក្រោមស្រទាប់អេក្រង់ ហើយអាចនឹងត្រូវពន្យាពេលក្នុងការបញ្ចេញវាជាមួយទូរសព្ទស៊េរីបន្ទាប់របស់ខ្លួនទៀតផង។

ទោះយ៉ាងណា ថាតើក្រុមហ៊ុនមួយណាជាអ្នកពាំនាំបច្ចេកវិទ្យាដោះសោដ៏ទំនើបនេះឱ្យពិភពលោកបានស្គាល់មុនដំបូងគេ: ចិន អាមេរិក ឬកូរ៉េខាងត្បូង? គឺមានតែពេលវេលាទេដែលអាចបញ្ជាក់បានច្បាស់ពិតប្រាកដ។ ដូច្នេះ សូមប្រិយមិត្តកុំភ្លេចតាមដានជាមួយក្រុមការងារ Post Tech ទាំងអស់គ្នា៕

អត្ថបទ: សេង, ប្រភពព័ត៌មាន: cnet