ទីបំផុតប្រព័ន្ធប្រតិបត្តិការ Android ជំនាន់ ៨ រសជាតិ Oreo ត្រូវបានប្រកាសចេញជាផ្លូវការហើយ នៅថ្ងៃម្សិលមិញនេះ។ តែអ្វីដែលត្រូវរងចាំបន្តទៀតនោះគឺ ថាតើស្មាតហ្វូនម៉ូឌែលណាខ្លះដែលនឹងមានលិឍអាចធ្វើបច្ចុប្បន្នភាព ឬបំពាក់ជំនាន់ចុងក្រោយនេះបាននោះ។

ក៏ដូចជាជំនាន់មុនៗរបស់វាដែរ ជាបឋមក្រុមហ៊ុន Google តែងដាក់ឱ្យប្រព័ន្ធ Android កំណែថ្មី ដំណើរការលើស្មាតហ្វូនផ្លូវការរបស់ខ្លួន មានដូចជា Google Pixel, Nexus 5X និង Nexus 6P។

បើតាមអនុប្រធានផ្នែកគ្រប់គ្រងផលិតផល Android លោក Sammer Samat បានថ្លែងឱ្យដឹងថា ខ្លួនកំពុងធ្វើការជាមួយក្រុមហ៊ុន Samsung, HTC, Huawei, Essential និង​ក្រុមហ៊ុនផលិតស្មាតហ្វូនដទៃផ្សេងទៀត ដើម្បីពាំនាំ Oreo ទៅលើទូរសព្ទដៃទំនើបរបស់ពួកគេ ទាំងតាមរយៈការធ្វើបច្ចុប្បន្នភាព (Upgrade) និងទាំងការដាក់ឱ្យដំណើរការស្រាប់ចេញពីប្រអប់ នៅក្នុងឆ្នាំនេះតែម្តង។

គួររំឭកថា​ Android O បានពាំនាំមកជាមួយការផ្លាស់ប្តូរគួរឱ្យកត់សម្គាល់មួយចំនួនដើម្បីប្រណាំងប្រជែងជាមួយប្រព័ន្ធ iOS 11 របស់ក្រុមហ៊ុន Apple ក្នុងនោះរាប់បញ្ចូលទាំងការជួយបង្កើនប្រសិទ្ធភាពនៃការប្រើប្រាស់ថាមពលថ្ម ល្បឿនដំណើរការប្រើប្រាស់ និងផ្ទាំងផ្តល់ដំណឹង ជាដើម៕

ប្រភពព័ត៌មានៈ​ tomsguide