ក្រុមអន្ធពាលបានឆ្មក់ចូលប៉ុស្តិ៍នគរបាលជាច្រើនកន្លែងដើម្បីប្លន់យកអាវុធនៅរដ្ឋធានី Port-au-Prince របស់ប្រទេសហៃទី
(Reuters) ៖ កាលពីចុងសប្តាហ៍ ក្រុមអន្ធពាលបានឆ្មក់ចូលប៉ុស្តិ៍នគរបាលជាច្រើនកន្លែងដើម្បីប្លន់យកអាវុធនៅរដ្ឋធានី Port-au-Prince របស់ប្រទេសហៃទី នៅក្នុងការវាយប្រហារដ៏សាហាវមួយ ខណៈដែលអំពើហឹង្សារវាងក្រុមប្រដាប់អាវុធបានផ្ទុះឡើងដោយមានជម្លោះយ៉ាងខ្លាំងនៅក្នុងសង្កាត់មួយនៅភាគខាងត្បូងដែលបង្ខំឲ្យប្រជាជនរាប់ពាន់នាក់ភៀសខ្លួន។ ក្នុងរយៈពេលប៉ុន្មានឆ្នាំកន្លងមកនេះ ក្រុមអន្ធពាលបានរីករាលដាលនៅក្នុងប្រទេសក្រីក្របំផុតនៅទ្វីបអាមេរិក ចំពេលដែលភាពចលាចលនយោបាយ និងភាពវឹកវរសេដ្ឋកិច្ចដែលកំពុងកើនឡើង។ ក្រុមប្រដាប់អាវុធមានអាវុធលើសកម្លាំងសន្តិសុខរបស់ហៃទី និងមានការប្រយុទ្ធគ្នាទៅវិញទៅមកដើម្បីដណ្តើមយកទឹកដីបានកើនឡើង។ កាលពីថ្ងៃអាទិត្យ អង្គការសហប្រជាជាតិបាននិយាយថា ខ្លួនមានការព្រួយបារម្ភយ៉ាងខ្លាំងអំពីផលប៉ះពាល់នៃអំពើហិង្សាដែលកំពុងកើនឡើងលើជនស៊ីវិលដោយបានរំលឹកពីឧប្បត្តិហេតុស្រដៀងគ្នានេះកាលពីឆ្នាំមុនដែលបានបង្ខំឲ្យប្រជាជនរាប់ពាន់នាក់ភៀសខ្លួន។ ប្រទេសហៃទីក៏កំពុងប្រឈមមុខនឹងការកើនឡើងនៃករណីជំងឺរាតត្បាតកូវីត ១៩ ហើយកំពុងជំរុញឲ្យមានការធ្វើប្រជាមតិមួយនៅចុងខែមិថុនាអំពីរដ្ឋធម្មនុញ្ញថ្មីមួយ។…