Android និង iOS គឺជាប្រព័ន្ធប្រតិបត្តិការចល័តគូប្រណាំងប្រជែងនឹងគ្នាច្រើនឆ្នាំមកហើយ។​​ ពីមួយជំនាន់ទៅមួយជំនាន់ ប្រព័ន្ធទាំងពីរនេះតែងដាក់បញ្ចូលនូវមុខងារពិសេសថ្មីៗជាបន្តបន្ទាប់។ តែមកទល់ពេលនេះ គេឃើញមាន​ប្រព័ន្ធ Android របស់ Google មានការផ្លាស់ប្តូរមុខងារច្រើន សម្បូរបែប និងបើកចំហរជាងប្រព័ន្ធ iOS របស់ Apple។ ជារួម គេសង្កេតឃើញមានលក្ខណ:ពិសេស ៥ លើប្រព័ន្ធ Android Nougat ដែលអ្នកប្រើប្រាស់ស្មាតហ្វូនភាគច្រើនលើសលុបចង់បាន តែ Apple មិនទាន់បានផ្តល់ឱ្យតាមរយ:ប្រព័ន្ធ iOS លើ iPhone និង iPad នៅឡើយ។

១- កំំណត់កម្មវិធី Default

ប្រសិនបើលោកអ្នកវាយពាក្យ “iOS 11 Wish List” នៅលើ Google Search អ្នកនឹងឃើញមានការស្នើឱ្យមានមុខងារជ្រើសរើសកម្មវិធី Default ជាច្រើនទៅកាន់ក្រុមហ៊ុន Apple ខណ:មុខងារនេះ មានជាយូរមកហើយនៅលើទូរសព្ទដើរដោយប្រព័ន្ធ Android។ កម្មវិធី Default លើប្រព័ន្ធ Android អនុញ្ញាតឱ្យអ្នកប្រើប្រាស់ជ្រើសរើសកម្មវិធីផ្សេងៗសម្រាប់​បើកដំណើរការអ្វីមួយដោយស្វ័យប្រវត្តិ ដូចជាបើកគេហទំព័រ ហៅទូរសព្ទ ផ្ញើសារ និងចាក់ចម្រៀងជាដើម ខុសពីកម្មវិធីដើមរបស់វាបាន។ ហើយដើម្បីធ្វើដូច្នេះ លោកអ្នកអាចចូលទៅកាន់កម្មវិធី Settings -> Apps -> Default Apps។

២- គ្រប់គ្រងសារដំណឹងបែបថ្មី

នៅលើផ្ទាំង Notification លើប្រព័ន្ធ Android 7 (Nougat) សារដំណឹងដែលផ្ញើចូលតាមកម្មវិធីដូចគ្នា វានឹងរៀបចំឱ្យលោតបង្ហាញជាប់ៗគ្នាតាមលំដាប់ ក្រោមឈ្មោះតែមួយ និងអាចអូសចុះក្រោមដើម្បីឱ្យវាបង្ហាញសារបន្ថែមបាន។ ម្យ៉ាងទៀត ដើម្បីដកសារមួយចេញ គេគ្រាន់តែយកម្រាមដៃអូសលើវាទៅម្ខាងចេញជាការស្រេច ដែលនេះខុសពីផ្ទាំង Notification Center លើប្រព័ន្ធ iOS ដែលទាមទារឱ្យអូសទៅឆ្វេង ឬស្តាំ រួចចុចលើប៊ូតុង Clear។

ដោយឡែក ផ្ទាំងកម្មវិធីដែលអាចប្រើ​ម្រាមដៃអូសចុះពីគែមអេក្រង់ខាងលើរបស់ Android ត្រូវបានរចនាក្រឡោម​បង្ហាញសារខាងក្នុងស្រឡះល្អ ងាយស្រួលមើល ហើយអាចកំណត់អតិភាពសម្រាប់សារដំណឹងណាដែលសំខាន់ផងដែរ ដោយវានឹងនៅតែលោតបង្ហាញឡើងទោះបីទូរសព្ទបើកមុខងារ Do Not Disturb ក៏ដោយ។ លក្ខណ:ពិសេសៗទាំងនេះ គឺពុំមានឡើយនៅលើទូរសព្ទ iPhone ហើយសូម្បីតែលើប្រព័ន្ធ iOS 11 ដែលនឹងបើកឱ្យទាញយកជាសាធារណ:ឆាប់ៗខាងមុខ។

៣- កម្មវិធីថតសំឡេងពេលកំពុងសន្ទនាទូរសព្ទ

នេះគឺជាមុខងារដ៏សំខាន់មួយដែលអ្នកប្រើប្រាស់ទូរសព្ទចល័តទូទៅចង់បានបំផុត។ តែរហូតមកទល់ពេលនេះ អ្នកប្រើប្រាស់ទូរសព្ទ iPhone គឺពិបាករកកម្មវិធីសម្រាប់ថតសំឡេងដូចនេះខ្លាំងណាស់ ខណ:កម្មវិធីដែលអាចថតបាន វាទាមទារបង់ថ្លៃសេវាយ៉ាងខ្ពស់ និងពិបាកក្នុងការប្រើប្រាស់ទៀតផង។ ផ្ទុយទៅវិញ សម្រាប់ទូរសព្ទពពួក Android គឺមានច្រើនណាស់ ហើយមួយចំនួនអាចទាញយកទៅដំឡើងប្រើនៅលើទូរសព្ទដោយសេរីពី PlayStore ទៀតផង។ ជាអាទិ៍ កម្មវិធីឈ្មោះ Auto call recorder និង Automatic Call Recorder ជាដើម។

៤- អាចបង្កើតគណនីសម្រាប់អ្នកប្រើច្រើនគ្នាបាន

លើទូរសព្ទ Android ភាគច្រើន (ក្រុមហ៊ុនខ្លះបិទមុខងារនេះចោល ហើយដាក់ជំនួសមុខងាររបស់ខ្លួនវិញ) គឺមាន​ភ្ជាប់មកជាមួយមុខងារ Multi-user mode ដែលអនុញ្ញាតឱ្យលោកអ្នកបង្កើត Profile ផ្សេងគ្នាសម្រាប់គោលដៅប្រើប្រាស់ខុសៗគ្នាបាន។ មុខងារដ៏ពិសេសនេះ គឺមានតាំងពី Android ជំនាន់ទី ៥ ឬ Lollipop មកម្លេះ ខណ: Apple នៅតែមិនទាន់អើពើក្នុងការដាក់បញ្ចូលវាលើប្រព័ន្ធ iOS សម្រាប់ផលិតផល iPhone និង iPad របស់ខ្លួននៅឡើយ។

​៥- អាចបើកកម្មវិធីច្រើនលើផ្ទាំងអេក្រង់តែមួយ

សម្រាប់ប្រព័ន្ធ iOS ដប់ជំនាន់មកហើយ គឺពុំទាន់មានមុខងារដែលអនុញ្ញាតឱ្យ iPhone ឬសូម្បីតែ iPad ដែលមានអេក្រង់ធំ ប្រើកម្មវិធីច្រើនលើផ្ទាំងអេក្រង់តែមួយក្នុងពេលដំណាលគ្នាបាននៅឡើយទេ។ ដោយឡែក សម្រាប់ប្រព័ន្ធ Android វិញ គឺមានចាប់តាំងពីឆ្នាំ ២០១២ នៅលើ Galaxy Note 2 មកម្លេះ។ លើសពីនេះ តាមរយ: Android Nougat ដែលចាប់ដាក់ឱ្យប្រើប្រាស់កាលពីឆ្នាំមុន Google បានដាក់បញ្ចូលជាផ្លូវការនូវមុខងារ​ញែក​អេក្រង់ជាពីរសម្រាប់ដំណើរការកម្មវិធីពីរផ្សេងគ្នាក្នុងពេលតែមួយ។ មុខងារពិសេសមួយនេះ ផ្តល់អត្ថប្រយោជន៍ច្រើនណាស់ តួយ៉ាងដូចជា វាអនុញ្ញាតឱ្យអ្នកប្រើប្រាស់អាចទស្សនាកម្មវិធីផ្សាយផ្ទាល់លើ YouTube និងបន្តការឆ្លើយឆ្លងសារជាមួយមិត្តភក្តិលើបណ្តាញសង្គម Facebook បានយ៉ាងរីករាយជាដើម៕

ប្រភពព័ត៌មាន: makeuseof