កាលពីឆ្នាំ ២០១៥​ គ្រាដែលប្រព័ន្ធប្រតិបត្តិការ Windows 10 ចាប់កំណើតឡើងដំបូង ក្រុមហ៊ុន Microsoft ក្រោមការដឹកនាំរបស់លោក Satya Nadella បានប្រកាសពីមហិច្ឆិតា កំណត់គោលដៅអ្នកដំឡើងប្រើឱ្យបានចំនួន ១០០០ លាននាក់ មុនបំ​ណាច់​ឆ្នាំសារពើព័ន្ធ ២០១៨ របស់ខ្លួន។

លុះមកទល់ពេលនេះ Microsoft Windows 10 មានអ្នកចុះឈ្មោះប្រើសកម្មប្រ​ចាំខែលើឧបករណ៍ផ្សេងៗដល់ ៥០០ លាននាក់ហើយ ហើយតួលេខនេះ គឺកើនពី ៤០០ លាននាក់​ កាលពីក្រុមហ៊ុនបានធ្វើបច្ចុប្បន្នភាពក្នុងខែសីហា ឆ្នាំ ២០១៦។

ដើម្បីឈានទៅដល់គោលដៅឱ្យមានអ្នកប្រើប្រាស់ដល់ខ្ទង់ពាន់លាននេះ ក្រុមហ៊ុនផលិត Software យក្សរបស់អាមេរិក កំពុងព្យាយាមបញ្ចុះបញ្ចូលក្រុមអ្នកអភិវឌ្ឍកម្មវិធី Android និង iOS ថា ពេលនេះ Windows 10 មានអតិថិជនប្រើប្រាស់ ឈានដល់កម្រិតមួយសមល្មមអាចផ្តល់តម្លៃគ្រប់គ្រាន់សម្រាប់ពួកគេក្នុងការផលិត​ចេញនូវកម្មវិធីផ្សេងៗហើយ។

ក្រុមហ៊ុន Microsoft និយាយថា Windows 10 ទទួលបានការចាប់អារម្មណ៍ប្រើប្រាស់ខ្ពស់ជាងគេបំផុតមិនធ្លាប់មាន ក្នុងចំណោមជំនាន់ប្រតិបត្តិការ Windows នានា ដោយសារតែវាបើកឱ្យអ្នកប្រើប្រាស់ Windows 7 និង 8 អាចកែឡើងដោយសេរីក្នុងឆ្នាំដែលវាដាក់ចេញដំបូង។

គួរបញ្ជាក់ថា Microsoft ទើបប្រកាសចេញកុំព្យូទ័រយួរដៃត្រកូល Surfaceដំបូងបង្អស់ ដោយដើរលើប្រព័ន្ធ Windows 10 S ថ្មី ដែលវាត្រូវបានអភិវឌ្ឍឡើងសម្រាប់កុំព្យួទ័រកម្រិតទាបអាចដំណើរការបានយ៉ាងរលូន ហើយនេះត្រូវគេជឿថា ជាផ្នែកមួយនៃយុទ្ធសាស្រ្តរបស់ក្រុមហ៊ុនក្នុងការឈានទៅសម្រេចគោលដៅអ្នកប្រើប្រាស់ដល់ ១ ពាន់លាន៕

ប្រភពព័ត៌មាន: businessinsider